गावगाथा स्पर्धेचा निकाल

1
25
_Gavgatha_1.jpg

महाराष्ट्रातील प्रत्येक गावाची माहिती ललित, परंतु वस्तुनिष्ठ स्वरूपात संकलित करावी या उद्देशाने ‘थिंक महाराष्ट्र डॉट कॉम’ने ‘गावगाथा’ स्पर्धा जाहीर केली होती. तिला वाचकांनी उत्स्फूर्त प्रतिसाद दिला. एकूण 119 (एकशेएकोणीस) वाचकांनी त्यांच्या गावांसंबंधी ठरवून दिलेल्या घटकांआधारे माहितीपर ललित लेखन पाठवले. त्यांचे परीक्षण रमेश पडवळ (पत्रकार, नाशिक), मनीष राजनकर (सामाजिक कार्यकर्ते, भंडारा) आणि नितेश शिंदे (‘थिंक महाराष्ट्र डॉट कॉम’ प्रतिनिधी) यांनी केले. त्यानुसार पुढील तीन स्पर्धक पहिला, दुसरा व तिसरा क्रमांकाने विजयी ठरले आहेत.

प्रथम पारितोषिक १. वैशाली तायडे – (जळगाव जिल्ह्यातील फैजपूर गाव) • तीन हजार रुपये •

द्वितीय पारितोषिक २. कमलाकर जाधव – (रत्नागिरी जिल्ह्यातील वेत्त्ये गाव) • दोन हजार रुपये •

तृतीय पारितोषिक ३. अभिजित पानसे – (वर्धा जिल्ह्यातील शहीद आष्टी गाव) • एक हजार रुपये •

पारितोषिक विजेत्यांचे ‘थिंक महाराष्ट्र डॉट कॉम’कडून अभिनंदन! त्यांच्या पारितोषिक रकमेचे चेक त्यांना रवाना केले जात आहेत. त्यांचे लेख आठवडाभरात ‘थिंक महाराष्ट्र डॉट कॉम’वर प्रसिद्ध होतील.

परीक्षकांनी समालोचनपर काही निरीक्षणे नोंदवली आहेत. तीही प्रसिद्ध करत आहोत. 

‘गावगाथा’ स्पर्धा ‘थिंक महाराष्ट्र डॉट कॉम’ने व्यापक उद्दिष्टाने घेतली होती. त्यामध्ये लेखनाची गुणवत्ता हा महत्त्वाचा भाग आहेच; परंतु राज्यातील सुमारे पंचेचाळीस हजार खेड्यांची व शहरांची माहिती संकलित होणे हे ‘थिंक महाराष्ट्र डॉट कॉम’ला महत्त्वाचे वाटते. त्या दृष्टीने स्पर्धेतील लेख; त्या त्या लेखकाकडून शक्य तेवढे परिपूर्ण करून घेऊन ते ‘थिंक महाराष्ट्र डॉट कॉम’वर प्रसिद्ध करण्याची योजना आहे. त्या बदल्यात प्रत्येक लेखकाला अल्पस्वल्प मानधनही लेख प्रसिद्ध झाल्यानंतर दिले जाईल.

गावागावांची माहिती हा ‘थिंक महाराष्ट्र डॉट कॉम’च्या व्यापक उद्दिष्टाचा एक भाग आहे. त्याशिवाय, ‘थिंक महाराष्ट्र डॉट कॉम’तर्फे प्रत्येक गावातील कर्तबगार व छांदिष्ट व्यक्ती, उपक्रमशील खासगी व सार्वजनिक संस्था आणि मंदिर-मशिदीपासून वैशिष्ट्यपूर्ण खाद्यपदार्थांपर्यंतचे संस्कृतिसंचित जमा करण्याचा प्रयत्न चालू आहे. लोकांनी लोकांसाठी चालवलेले व्यासपीठ असे ‘थिंक महाराष्ट्र डॉट कॉम’चे स्वरूप आहे. क्राउड सोअर्सिंग हे आधुनिक तंत्र त्यासाठी उपलब्ध आहे. कृपया या खटाटोपात सामील व्हावे, आपापल्या गावांची माहिती द्यावी. ‘थिंक महाराष्ट्र डॉट कॉम’ या वेबपोर्टलला भेटही द्यावी.

– दिनकर गांगल,
मुख्य संपादक, थिंक महाराष्ट्र डॉट कॉम
info@thinkmaharashtra.com

About Post Author

Previous articleसूचनाफलकातून जागा झाला समाजभाव!
Next articleबंड्या साने- पौर्णिमा उपाध्याय – मेळघाटातील लढवय्या दांपत्य
दिनकर गांगल हे 'थिंक महाराष्‍ट्र डॉट कॉम' या वेबपोर्टलचे मुख्‍य संपादक आहेत. ते मूलतः पत्रकार आहेत. त्‍यांनी पुण्‍यातील सकाळ, केसरी आणि मुंबईतील महाराष्‍ट्र टाईम्स या वर्तमानपत्रांत सुमारे तीस वर्षे पत्रकारिता केली. त्‍यांनी आकारलेली 'म.टा.'ची रविवार पुरवणी विशेष गाजली. त्‍यांना 'फीचर रायटिंग' या संबंधात राष्‍ट्रीय व आंतरराष्‍ट्रीय (थॉम्‍सन फाउंडेशन) पाठ्यवृत्‍ती मिळाली आहे. त्‍याआधारे त्‍यांनी देश विदेशात प्रवास केला. गांगल यांनी अरुण साधू, अशोक जैन, कुमार केतकर, अशोक दातार यांच्‍यासारख्‍या व्‍यक्‍तींच्‍या साथीने 'ग्रंथाली'ची स्‍थापना केली. ती पुढे महाराष्‍ट्रातील वाचक चळवळ म्‍हणून फोफावली. त्‍यातून अनेक मोठे लेखक घडले. गांगल यांनी 'ग्रंथाली'च्‍या 'रुची' मासिकाचे तीस वर्षे संपादन केले. सोबत 'ग्रंथाली'ची चारशे पुस्‍तके त्‍यांनी संपादित केली. त्‍यांनी संपादित केलेल्‍या मासिके-साप्‍ताहिके यांमध्‍ये 'एस.टी. समाचार'चा आवर्जून उल्‍लेख करावा लागेल. गांगल 'ग्रंथाली'प्रमाणे 'प्रभात चित्र मंडळा'चे संस्‍थापक सदस्‍य आहेत. साहित्‍य, संस्‍कृती, समाज आणि माध्‍यमे हे त्‍यांचे आवडीचे विषय आहेत. त्‍यांनी त्‍यासंबंधात लेखन केले आहे. त्यांची ‘माया माध्यमांची’, ‘कॅन्सर डायरी’ (लेखन-संपादन), ‘शोध मराठीपणाचा’ (अरुणा ढेरे व भूषण केळकर यांच्याबरोबर संपादन) आणि 'स्‍क्रीन इज द वर्ल्‍ड' अशी पुस्तके प्रसिद्ध झाली आहेत. त्‍यांना महाराष्‍ट्र सरकारचा 'सर्वोत्‍कृष्‍ट वाङ्मयनिर्मिती'चा पुरस्‍कार, 'मुंबई मराठी साहित्‍य संघ' व 'मराठा साहित्‍य परिषद' यांचे संपादनाचे पुरस्‍कार वाङ्मय क्षेत्रातील एकूण कामगिरीबद्दल 'यशवंतराव चव्‍हाण' पुरस्‍कार लाभले आहेत.

1 COMMENT

  1. गावगाथा स्पर्धा कशी रंगत…
    गावगाथा स्पर्धा कशी रंगत गेली याचा वरील वर्णनातून अनुभव दिल्याबद्दल धन्यवाद! स्पर्धेपेक्षा माझ्या गावाच्या माहितीचा लेख आपल्या पोर्टलवर झळकल्यावर खरा आनंद होईल! तो आनंद लवकरात लवकर मिळावा…

Comments are closed.